कहे कबीर जो रामहि जाने

                         रमैनी 67

देह हलाये भक्ति न होई, स्वांग धरे नर बहु बिधि सोई ।

धींगी धींगा भलो न माना, जो काहू मोहि हृदय न जाना ।

मुख किछु और हृदय किछु आना, सपनेहु काहु मोहि न जाना ।

ते दुख पावै इह संसारा, जो चेतहु तो होय उबारा ।

जो गुरु की चित निंदा करई, सूकर स्वान जन्म ते धरई ।

लख चौरासी जीव जन्तु में, भटकि भटकि दुख पाव ।

कहे कबीर जो रामहि जाने, सो मोहि नीके भाव ।

                          रमैनी 68

तेहि वियोग ते भये अनाथा, परि ‘निकुंज बन’ पावै नहि पंथा?

बेदो नकल कहै जो जानै, जो समुझै सो भलो न मानै ।

नटवर विद्या खेल जो जानै, तेहि गुन के ठाकुर भल मानै ।

उहै जो खैलै सब घट माहीं, दूसर के कछु लेखा नाहीं ।

भलो पोच जो अवसर आवै, कैसहु कै जन पूरा पावै ।

जाकर सर लागै हिये, सो जानेगा पीर ।

लागै तो भागे नहीं, सुख के सिंधु कबीर ।

                       रमैनी 69

ऐसा जोग न देख भाई, भूला फिरै लिये गफिलाई ।

महादेव को पंथ चलावै, ऐसो बडो महंत कहावै ।

हाट बजारै लाबै तारी, कच्चा सिद्धहि माया प्यारी?

कब दत्ते मावासी तोरी, कब सुकदेव तोपची जोरी ।

नारद कब बंदूक चलाया, व्यासदेव कब बंब बजाया ।

करहिं लराई मति के मंदा, ये अतीत की तरकस बंदा ।

भये विरक्त लोभ मन ठाना, सोना पहिर लजाबै बाना ।

घोरा घोरी कीन्ह बटोरा, गाँव पाय जस चलै करोरा ।

तिय सुंदरी न सोहई, सनकादिक के साथ ।

कबहुँक दाग लगावई, कारी हाँडी हाथ ।