कहहिं कबीर चित चेतहु भाई

                          रमैनी 55

गए राम औ गए लछमना, संगन गै सीता अस धना ।

जात कौरवै लागु न बारा, गये भोज जिन्ह साजल धारा?

गए पंडव कुन्ती अस रानी, गए सहदेव जिन मति बुधि ठानी ।

सर्ब सोने के लंक उठाई, चलब बार कछु संग न लाई ।

कुरिया जासु अंतरिछ छाई, सो हरिचंद्र देखि नहिं जाई ।

मूरख मानुष बहुत संजोई, अपने मरे और लग रोई?

ई न जान अपनौ मरि जैबे, टका दस बिढ़े ओर लै खैबै?

अपनी अपनी करि गए, लागि न काहु के साथ ।

अपनी करि गए रावणा, अपनी दसरथ नाथ ।

                             रमैनी 56

दिन दिन जरे जननि के पाऊ, गडे जाए न उमगै काऊ ।

कंधा देई मसखरी करई, कहुधौ कवनि भांति निस्तरई ।

अकरम करै करम को धावै, पढि गुनि वेद जगत समुझावै?

छंछे परे अकारथ जाई, कहहिं कबीर चित चेतहु भाई ।

                            रमैनी 57

क्रितिया सूत्र लोक एक अहई, लाख पचास कि आइस कहई?

विद्या वेद पढै पुनि सोई, बचन कहत परतछै होई ।

पैठि बात विद्या के पेटा, बाहु के भर्म भया संकेता ।

खग खोजन के तुम परे, पाछे अगम अपार ।

बिन परिचय कस जानि हौ, झूठा है हंकार ।

                        रमैनी 58

तै सुत मानु हमारी सेवा, तो कहँ राज देउँ हो देवा ।

अगम दृगम गढ देउँ छोडाई, औरो बात सुनहु कछु आई ।

उत्पति परलय देउँ देखाई, करहु राज सुख बिलसहु जाई ।

एकौ बार न होय है बांको, बहुरि जन्म नहिं होइ हैं ताको ।

जाय पाप सुख होवे घाना, निश्चै बचन कबीर के माना ।

साधु संत तेई जना, जिन मानल बचन हमार ।

आदि अंत उत्पत्ति प्रलय, देखहु दृष्टि पसार ।